LAOAG CITY – Napabilib ti determinasion ti maysa a grupo dagiti lallaki idiay Georgia, U.S.A. kalpasan a nagay-ayamda ti basketball nga awan ti sardayna iti uneg ti 121 hours and 3 minutes tapno magun-od ti Guinness World Record.
Ti marathon game ket indauloan ti grupo manipud iti Atlanta a Men Opposing Sex Trafficking (MOST) ken naisayangkat daytoy iti gym ti Landmark Christian School.
Naammoan a 23 ti umaayam nga agtawen ti 17 agingga iti 64 ti nakipaset iti basketball marathon game.
Iti uneg ti sumurok lima nga aldaw, saanda a rimmuar iti gym uray iti break time-da. Iti panaglippas ti ay-ayam, rimmuar iti iskor a 13,096 kontra iti 12,972.
Malaksid iti baro a rekord, adda pay ti naun-uneg a rason ti sakripisioda gapu ta ti maukkon a pundo manipud iti ay-ayamda ket mailatang tapno labanan ti human trafficking ken tumulong kadagiti biktima ti panangabuso.
