LAOAG CITY – Inbatad ni Police Major Eduardo Santos, ti chief of police ti Philippine National Police iti ili ti San Nicolas a namunganay ti napasamak a rambol bayat ti Game 1 ti championship game ti Basketball iti adda ti napasaktan ken bimmales.
Segun kenni Santos, nabara ti laban iti nagbaetan ti Barangay 14 ken Barangay 15 idi rabii a nagresulta iti panagrarambol dagiti players.
Inlawlawag na a dagus met a naganawa dagiti kameng ti pulisya iti nasao nga ili ken nagsasarita dagitoy agingga a naituloy met laeng ti laban ngem naikkat dagiti karaman iti daytoy.
Mainaig iti daytoy, inbatad na nga itay bigat ket pinaayaban na dagiti amin a players, coach ken dagiti kapitan iti nadakamat a dua a barangay tapno agsasarita da.
Kunana met a maituloy latta ti Game 2 intono rabii ken tapno saanen a maulit ti insidente ket nayunan na ti maideploy a kameng ti pulisya ken uray dagiti tanod kadagiti dua a barangay ket tumulong nga agbantay para iti linak, urnos ken talna kabayatan ti laban.
Kabayatanna, immapela ni Santos iti publiko ken amin a karaman a players a liklikan ti agbibinnara tapno naurnos latta ti maiyuswat a liga.
