LAOAG CITY – Naisayangkat iti kaunaan a gundaway ti Basura Summit ditoy probinsia iti panangidaulo ti Provincial Government of Ilocos Norte babaen iti Environment and Natural Resources Office.
Ditoy a napatalgedan ti pagsasao ni dati a First Lady Imelda Marcos nga adda kuarta iti basura kalpasan a naipakita dagiti agkakapintas a produkto a naaramid dagiti nadumaduma a Local Government Units ditoy probinsia manipud iti basura iti bukud dagitoy a lugar.
Sinaludaran ni Gov. Cecilia Araneta Marcos dagiti lokal a gobierno kadagiti agkakapintas a naaramidda a produkto kas ti tugaw, lamisaan, dekorasion ken bags.
Malaksid iti daytoy, adda pay dagiti naaramid a soil conditioner a dakkel a tulong kadagiti mannalon ken dagiti napintas iti kalidadna a bloke a mabalin a mausar kadagiti nagdumaduma a proyekto.
Maibilang kadagiti Local Government Units a nangipakita kadagiti produkto a naaramidda manipud iti basura iti ili ti Pagudpud, Marcos, Bacarra ken iti siudad ti Batac.
Binigbig ti gobernador a nakadakdakkel a tulong iti pannakasaluad ti aglawlaw daytoy nga ar-aramiden dagiti Local Government Units.
Inpalagipna a maysa ti pannakatagiben ti aglawlaw kadagiti kangrunaan nga intandudo daydi Sangguniang Panlalawigan Member Mariano “Nonong” Marcos nga asawana a kalikagumna a maitultuloy.
Kagiddan daytoy, inpannakkel ni Gov. Marcos ti household composting a dakkel a tulong iti aglawlaw ken iti pannakaisigurado ti natalged a maipauneg a natnateng.
Inbatadna a kas ina ti probinsia ket mamati a ti pannakasaluad iti aglawlaw ket mangrugi iti tunggal maysa, iti uneg ti pamilia ken iti uneg ti barangay.
Innayonna a ti Ilocos Norte ti pagnaedan, pakatubayan dagiti agtutubo ken pakamulian ti masakbayan rason a responsibilidad ti tunggal maysa a mapagtalinaed a nadalus ken natalged.
