LAOAG CITY – Inannugot ni Atty. Vic Rodriguez, abodago ni dati a Senador Bongbong Marcos a maalarma da iti panangitantan iti Korte Suprema ti preliminary conference iti election protest nga inpila ti dati a senador kontra ken ni Vice President Leni Robredo.
Maiyuswat koma ti preliminary conference intono Hunyo 21 iti agdama a tawen.
Segun ken ni Rodriguez, maawatan da ti kinapateg ti panangiyuswat ti Korte Suprema iti oral argument seknan iti martial law nga indeklara ni Presidente Rodrigo Duterte iti intero a Mindanao.
Nupay kasta, inpetteng na a saan da a maawatan no apay kasapulan a maapektaran ti pannakaiyuswat ti preliminary conference.
Innayon na a saan a mabalin nga agtultuloy ti panangitantan ti kangatoan a korte ti pannakadengngeg ti kaso ti dati a senador gapu ta unfair kadagiti umili ken kalintegan ti amin a Pilipino a maamoan no siasinno ti pudno a nangatiw kas bise presidente iti kallabes nga eleksyon.
Inlawlawag pay ni Atty. Rodriguez nga awanen ti maaramidan da iti nagbalin a desisyon iti Korte Suprema.
