LAOAG CITY – Ibilang ni dati a Senator Bongbong Marcos a ‘political sabotage’ ti nagwaras nga ‘emergency alert message’ kalpasan pangipila na ti kandidatura kas presidente iti 2022 elections.
Kuna ni Marcos a posible a pamermerdi laeng ti nasao a mensahe gapu ta uray isuna ket nakaawat iti daytoy.
Inbatad na a posible pay a maymaysa ti nangaramid ti nasao nga addang gapu ta apaman a nakapila ti certificate of candidacy (COC) ket dita a naipatulod ti mensahe ken kalpasan ti sumagmamano a minutos ket addan dagiti nagwaras a report seknan iti daytoy.
Nu pay kasta, kuna ni Marcos a maimbestigaran ti nasao a banag.
Kabayatanna, kuna ni dati a senador Marcos a sidadaan a manglaban kenni Bise Presidente Leni Robredo.
Innayun na a nakasagana ti partido Marcos iti masungad nga eleksyon.
