LAOAG CITY – Temporaryo a napaserraan dagiti innem a beach resort iti Brgy. Calayab ditoy siudad ti Laoag gapu ti kaaawan ti permit nga agoperar.
Segun kenni Ms. Antonette Bareng, mangidadaulo iti BPLO ditoy siudad, napaserraan dagiti nasao a beach resort gapu ti saan pay a nalawlawagan ti sitwasyon da iti Fort Ilocandia.
Maysa pay a makagapu ket iti saan da kuma a panagpabayad kadagiti agusar ti cottages iti beach front.
Mainaig iti sitwasyon, naukag ti BPLO a nabayadan ti amiliar ti nakaipatakderan dagiti cottage babaen kadagiti agtagikua ti beach resort.
Rumrumwar a nangabak da kontra iti Fort Ilocandia ngem saanen a naifollow up daytoy.
Basar met iti Community Environment and Natural Resources Office nga idadauloan ni Mrs. Sheila Camagon, nagaplikar ti Fort Ilocandia ti permit para ti pannakausar ti beach front iti nasao a lugar ngem awan pay ti panangapprobar ti kapitolyo probinsyal rason a pending ti estado na.
Kuna ni Camagon nga awan uray maysa nga agtagikua ti beach resort ti pinalubusan ti DENR nga ukoparen da ti beach front.
Innayon na a nagkinnaso dagiti agtagikua ti beach resort ken ti Fort Ilocandia ngem naabak dagiti maseknan rason a nakanselar amin dagiti application da.
Kabayatanna, kalikagum ti BPLO a maurnos ti problema iti nasao a barangay ken plano da ti makikoordinar iti CENRO seknan kadagiti mabalin nga aramiden da tapno maitultuloy ti operasyon dagiti beach resort.
