LAOAG CITY – Nakita a maysan a nalamiis a bangkay ti maysa a beautician iti beauty salon iti Barangay 14 ditoy siudad ti Laoag.
Ti biktima ket agtawen ti 53, awanan asawa ken residente ti Barangay Malaiba, Canlaon City, Negros Oriental ngem agdama nga agnanaed iti Barangay 14 ditoy siudad ti Laoag.
Basar iti Laoag City Police Station, segun iti katrabahoan ti biktima, immannugot isuna a maturog iti beauty salon ken idi agarup alas dos ti parbangon, apaman a mapan umisbo ket nadlawna a saanen nga agang-anges ti biktima isut gapuna nga insigida a nagkiddaw ti tulong kadagiti otoridad.
Naammoan a sakbay ti insidente, makapaspasar ti nakaro a sakit iti bukut ken buksit ti biktima.
Kabayatanna, nangiwayat ti post mortem examination ni Dr. Rodrigo Catcatan, mangidadaulo ti City Health Office ditoy siudad ti Laoag no sadinno nga awan ti pakalasinan a nadangran ti biktima ken ti rason ti pannakatayna ket gapu iti cardiac arrest.
