LAOAG CITY – Maalarma ni Ms. Stephanie Jay Ulep iti ili ti San Nicolas ken Miss Ilocos Norte 2021 4th runner-up iti pannaka-hack ti facebook account ken nausar para iti scam.
Segun ken ni Ulep, napasamak ti hacking iti facebook account na idi kalman, Mayo 28.
Kuna na a maysa a pagayam na ti nangipatulod ti link ken nalukatan na daytoy.
Inbatad na a kalpasan a malukatan na ti link ket dagus nga adda dagiti naawat na a messages nu sadino a naipakita ti email ken dadduma nga impormasyon na ken kalpasan ti sumagmamano a minutos ket nag-expire ti account na.
Mainaig iti daytoy, inpakaammo ni Ulep nga iti isu met laeng nga aldaw ket adda ti nagturong iti pagtaenganda a mangibagbaga nga adda ti naipatulod kenkuana a kwarta, banag a saan na a madepensaan gapu ta saan a nagdawat daytoy.
Inbatad na a dita a naamiris na nga us-usaren ti hacker ti account na tapno agdawat wenno umutang ti kwarta ken maipatulod iti agnagan ti Abigail Facundo.
Kabayatanna, kuna na nga apaman a naisubli kenkuana ti account na ken nagpost seknan iti napasamak, pinatuludan ti mensahe ni Facundo ken inlawlawagna a maysa met daytoy a biktima ti hacking.
Inpakaammo ni Ulep a nagkikita dagitoy iti stasyon ti pulisya ken dita a naamoan na a maysa pay nga agnagan ti Alvin ti na-hack ti account na nga isu met ti nagdawat ti impormasyon ken ni Facundo ken agpapada a nabiktima dagitoy ti scam.
Kuna na a basar iti palawag ni Facundo, nangipatulod ti ladawan ti ID ken dita nga inusar ti hacker tapno makaaramid ti Gcash account babaen iti nagan daytoy.
Gapu iti daytoy, nagreport da Ulep iti kapulisan ken manamnama a maiyuman da ti napasamak iti NBI intuno bigat.
Nagpalagip ni Ulep a saan a dagus nga agtalek ken masapol a kumpirmaran nga umuna ti pangipatuludan ti kwarta tapno saan nga agbalin a biktima scam.
