LAOAG CITY – Inrakurak ni House Deputy Minority Leader ken Bagong Henerasyon Representative Bernadette Herrera nga uray adda ti Expanded Solo Parents Welfare Act ket adu pay ti nasken nga aramiden ken ipaay kadagiti solo parent.
Kangrunaan a dinakamat ni Herrera a ti nasken a mapalaw ket ti tulong pinansial kadagiti solo parent, maaddaanda ti access iti nalaka a pabahay ken ad-adda a mapasayaat nga healthcare benefits pakairamanan ti mental health support.
Inlungalongna a manayonan ti subsidiya ti gobierno iti panagadal dagiti annak ti solo parents pakairamanan ti pannakaipasdek ti ad-adu pay a daycare center iti intero a pagilian.
Immunan nga inpakaammo ni Herrera nga ipayal-alistona kadagiti lokal a gobierno ken maseknan nga ahensia tapno iyal-alisto ti pannakaipaay ti Solo Parent ID tapno mabenepisiaranda kadagiti benepisio ken diskuento kas maiyataday iti linteg.
