LAOAG CITY – Iti uneg laeng ti tallo a bulan ita a tawen, dua a daras nga inpangato ti PhilHealth ti benepisio daytoy iti hemodialysis a dumanonen iti P1 a milyon iti kada tawen iti kada pasiente.
Immuna nga inpatungpal ti PhilHealth idi Hulio ti diskuento manipud iti P2,600 iti P4,000 iti kada sesyon ken ita nga Oktubre ket naipangato pay ti P6,350.
Naipablaak ken epektibo idi Oktubre 7, 2024 ti PhilHealth Circular No. 2024-0023, ti pagannurutan a nangipangato iti nasao a pakete para kadagiti miembro ken qualified dependents-da nga addaan ti chronic kidney disease stage 5 (CKD5).
Mabalinda nga usaren ti benepisio iti sadinoman nga accredited dialysis facility nga asideg kadakuada.
Inpetteng ni Emmanuel Ledesma Jr., Presidente ken mangidadaulo iti panangipatungpal ti PhilHealth nga iti baet ti panagngato ti reimbursement rate ti PhilHealth a P4,000 iti kada sesyon idi Hulio ket makaawat latta isuda ti report dagiti pasiente a dakkel ti baybayadanda iti panag-dialysis dagitoy.
