LAOAG CITY – Naiget nga ipawil ti Department of Social Welfare and Development (DSWD) ti pannakaisalda ti cash cards dagiti benepisyaryo ti Pantawid Pamilyang Pilipino Program (4Ps).
Segun ken ni Mr. Ronald Ponio, ti Social Welfare 3 a dumalan iti tallo a proseso dagiti maduktalan nga agisalda ti cash card na.
Inlawlawag ni Ponio a ti umuna a maaramid no adda ti maduktalan da nga agisalda ti cash card ket bagbagaan da.
Nupay kasta, no uliten to manen ti benepisyaryo ti 4Ps nga isalda ti cash card na ket mabalin a maikkat iti listaan.
Innayon na a ti umuna a rason no apay a maisalda dagiti benepisyaryo ti cash card da ket adda ti emergency a pasamak iti uneg ti pagtaengan da.
Immun-unan a nagballaag ni DSWD Secretary Erwin Tulfo nga uray dagiti agsalda ti cash card ti 4Ps ket mapatawan ti maiyannatop a pannusa.
