LAOAG CITY – Agtultuloy ti imbestigasyon ti BFP-Bacarra iti napasamak nga uram iti maysa a funeral parlor iti Barangay Corocor iti nasao nga ili.
Segun kenni Senior Fire Officer 1 Anghel iti BFP-Bacarra, ti agdama a makitkita da a namunganayan ti uram ket ti compose pit wenno pagpuuran nga innem laeng a metro ti kaadayo na iti nasao a funeral parlor.
Inlawlawag na a gapo ta naangin iti lugar ket alisto a nagramram ti apoy pakairaman pay a ti atep ti stock room ti funeral parlor ket anahaw.
Kunana nga awan pay ti indikasyon iti fault iti linya ti kuryente iti pasdek gapo ta nadalos met ti electrical system daytoy.
Karaman kadagiti nauram ket ti stock room ken ti lugan ti funeral parlor.
Innayon na a naireport kadakuada ti insidente iti 12:25 ken naideklara a fire out iti 1:11 ita a malem ken idi mapaspasamak ti uram ket awan ti tao iti nasao nga establishimento.
