LAOAG CITY – Nagpalagip ni Fire Supt. Roxanne Parado, Provincial Fire Marshal ti Bureau of Fire Protection ditoy Ilocos Norte kadagiti umili mainaig iti grassfire.
Segun kenkuana, masapul nga agbalin a naannad ken naridam dagiti umili gapu ta alisto ti panagramram ti apoy kadagitoy a panawen gapu iti naangin a paniempo.
Inbatadna a no saan a maliklikan ti agpuor ket nasken laeng a bantayanda tapno saan a mangitunda ti nalawa nga uram iti kabanbantayan.
Inlawlawagna nga addan dagiti nairekord a grassfire kadagiti sumagmamano nga ili ditoy probinsia isut gapuna nga ad-adda pay ti panangpaigetda iti panangipakaammo kadagiti barangay officials maipanggep iti daytoy a banag.
Kunana nga adda dagiti maisaysayangkat a training ken lecture kadagiti nagduduma a barangay tapno katinnulunganda dagitoy iti pananglapped kadagiti mapasamak nga uram.
