LAOAG CITY – Impasigurado ni Fire Superintendent Nemesio Valencio Jr,. ti Acting Provincial Fire Marshal ditoy probinsia a nakasaganan ti ahensia iti umay a Super El Niño.
Segun kenkuana, dakkel ti agbalin a risgo ti balabes a kinabara ti panawen gapu ta mangitunda daytoy ti forest fire wenno grass fire.
Basar ti naudi a datos, kunana a nangato ti nagbalin a bilang ti forest fire wenno grass fire.
Gapu iti daytoy, nakikoordinarda gadagiti water district ken local government units para iti insigida a panagrespondeda no adda mapasamak nga insidente.
Mainaig iti daytoy kunana a kinabaelanda iti naglabas a panawen ti dumalyasat a mangresponde kadagiti nakaro nga insidente ti uram iti babaen ti panangiyuswatda kadagiti panagsanay ken panangiwaras ti umdas nga impormasion iti publiko.
Kabayatanna, impasiguradona a kompleto ti ramit ti nasao nga ahensia tapno agresponde ti aniaman nga insidente ti uram.
Iti agdama, kunana nga awan ti animan nga insidente ti uram a pakaseknan ti Super El Niño.
