LAOAG CITY – Nangisayangkat ti sorpresa a panaginspeksyon dagiti kameng ti Bureau of Fire Protection (BFP) ken Search and Rescue Team nga idaulwan ni Doctor Melvin Manuel iti paglakoan ti paputok iti siruk ti Gilbert Bridge ditoy ciudad ti Laoag.
Segun ken ni Manuel, ti nagbalin nga addang da ket mandato a napagtutulagan babaen iti Committee on Public Safety tapno masigurado nga awan ti agbalin a problema iti panangsarabo ti baro a tawen.
Naamoan a ti kangrunaan a kinita ti grupo ni Manuel ket ti permit dagiti aglako ken no adda dagiti menor de edad nga aggatang kadagiti paputok.
Kabayatan ti kaadda da Manuel iti lugar ket naimatangan da a mismo ti pananglako ti maysa kadagiti aglaklako ti paputok ti agtawen ti 14 a menor de edad.
Gapu iti daytoy, binallaagan ni Manuel ti naglako a saannan nga uliten ti aglako ti paputok kadagiti menor de edad.
Inkari ni Manuel a no maamoan da pay a lakoan ti maseknan dagiti menor de edad ket paserraan da a dagus ti negosyo na.
