LAOAG CITY – Nagkiddaw ti augmentation ti Bureau of Fire Protection ditoy siudad ti Laoag iti Provincial Headquarters-da para iti pannakaisayangkat ti inspeksion kadagiti nagduduma nga establishimento.
Segun ken ni Senior Fire Officer 2 Melben Gappi, ti Bureau of Fire Protection ditoy siudad, masapol nga 40 a porsiento manipod iti pakabuklan a bilang dagiti pasdek-negosio ditoy siudad ti Laoag ket nasken a maileppas agingga ita a bulan ti Marso.
Inbatadna a namnamaen da nga umabot daytoy iti 1,200 a ribu a pasdek-negosio ditoy siudad ti masapol a mainspeksionda agingga inton agtapos ita a bulan.
Malaksid iti daytoy, inlawlawagna a naisayangkat pay ti fire drill ken fire safety lecture kadagiti nagduduma nga establishimento ditoy siudad ti Laoag.
Kunana nga adda pay ti naiyuswat nga Open House wenno ti panangimbitar kadagiti estudiante manipod kadagiti nagduduma a pagadalan ditoy siudad.
Inbatadna a babaen iti daytoy a programa ket maisuro kadakuada dagiti ramit nga us-usarenda no adda ti mapasamak nga uram pakairamanan ti water rescue ken emergency medical services.
Inlawlawagna a saan laeng a mapan agsebseb ti apoy ti trabaho dagiti padana a bumbero no di ket mangisaysayangkat pay ti nagduduma nga aktibidad kas ti fire safety inspections kadagiti pagadalan, pangopisinaan ken dadduma pay.
Innayonna nga umaboten ti 300 nga agad-adal ti bimmisitan iti fire station-da a nakipaset iti Open House sipod idi Lunes no sadino adu pay nga eskuela ti tumawtawag kadakuada tapno dagitoy met ti sumublat a makipartisipar iti nasao a programa.
