LAOAG CITY – Napalaos ti ragsak ni Fire Chief Inspector Roxanne Parado, fire marshal ditoy siudad ti Laoag.
Daytoy ket kalpasan a nagun-od ti BFP Laoag ti 2019 Best City Fire Station award iti intero a Rehiyon 1.
Kuna ni Parado a dakkel ti panagyaman na iti Diyos gapu iti panangtarabay ken panangited na ti pigsa iti sibubukel a BFP Laoag kasta met iti inted a suporta ti lokal a gobierno ditoy siudad nga idadauloan ni Mayor Michael Marcos Keon.
Inbaga na a dagiti nagibasaran ti regional office tapno magun-od ti nasao a pammadayaw ket ti napaigetan nga inspeksyon nga iyus-uswat ti BFP kadagiti pagadalan, barangay agraman dagiti nagduduma nga establisyimento.
Innayun na a napatgan pay ti kiddaw a mapapintas ti fire station ken dakkel ti nagbabaan ti nairekord nga insidente ti uram iti tawen 2019.
Mainaig iti daytoy, kuna na a saan a daytoy ti umuna a gundaway a makaawat ti nasao a pammadayaw ti BFP Laoag.
Inpakaamo na nga iti agdama ket ti fire fighting capability ti stasyon ti tutukanda tapno ad-adda a mapapintas ti serbisyo ken agtultuloy ti panangiyuswatda ti fire prevention activities.
Inpetteng ni Parado nga iti baet ti pannakaduod ti pammadayaw ket kapatgan ti panangited ti usto ken nasayaat a serbisyo iti publiko.
