LAOAG CITY – Maproblemaan ti Bureau of Fire Protection gapu ta nangrugi manen dagiti grassfire ditoy ciudad ti Laoag.
Segun ken ni Fire Senior Inspector Edison Reyes, ti Firemarshall iti Bureau of Fire Protection ditoy ciudad ti Laoag, immuna a napasamak ti grassfire iti lauden ti impounding center iti Laoag Police Station iti paset ti Barangay 1 ditoy ciudad, adda manen ti pannakauram ti kapanagan iti Barangay 12, partikular dagiti naitamtambak a basura iti lugar.
Malaksid kadagitoy ket adda pay ti napasamak a grassfire iti likud ti Marcos stadium, ken iti Padsan River a batog ti Brgy. Tangid ditoy ciudad ti Laoag.
Patien ni Reyes a mairanranta ti pannakauram dagiti dadduma a kapanagan ditoy ciudad ti Laoag tapno nalanglangto dagiti agtubo a root nga isu kaykayat dagiti dingwen idinto a dagiti dadduma a grassfire ket gapu iti pannakapuor dagiti naitamtambak a basura.
Mainaig iti daytoy, inbatad ni Reyes a makisarita danto kadagiti opisyal ti barangay a nakapasamakan ti grassfire tapno maliklikan a maulit ti napasamak.
Kabayatanna, nagpalagip met ni Reyes iti publiko a saan a basta mapan agiblleng ti basura iti nagduduma a lugar nga isu metten ti pagpuoran.
Inbalakad na a mapan laengen ikabil dagiti basura kadagiti lugar a naikeddeng a pagakupan dagiti garbage truck ditoy ciudad.
