LAOAG CITY – Agtultuloy ti imbestigasyon ti PNP-Nueva Era mainaig iti panggep a panangpapatay da ken ni Bgy. Kagawad Norwel Balagso y Revilla, agtawen ti 30 addaan iti asawa ken residente iti Bgy. Caray ti nasao nga ili babaen iti panang-ambush da kenkuana.
Segun ken ni P/S/Insp. Gerardo Mabini, Hepe ti Pulisya ti nasao nga ili, mabalin nga “old grudge” ti motibo ti nasao a pasamak.
Kunana nga inbaga kenkuana ni Balagso a ti pammati na a pinanggep da a patayen ket gapu iti kaadda ti kinariri na itay kallabes.
Gapu iti daytoy, plano ti PNP nga imbitaran ti kinariri ti opsiyal ti barangay.
Maipalagip nga agawiden ni Balagso inturong na ti kotse na a masya a Toyota altis, manipud iti inatendaraan na a christmas party ti barangay da idi addan iti nagsapalan ti barangay da ken ti Bgy. Acnam asideg ti rangtay idi nakanggeg ti putok.
Ti ammo na ket putok dagiti “firecrackers” iti pinanawan na a party ngem putok ti paltog a tumamtama iti lugan na.
Kas resulta, natamaan ti makinkattigid a paset ti “hood” ti kotse na.
Nakarukbre met dagiti pulis ti lima (5) a kapsula ti M16 armalite rifle iti nakapasamakan ti insidente.
Kit-kitan pay ti PNP no binutbuteng da laeng ni Balagso iti laksid iti klase ti kalibre ti paltog a nausar ket ti laeng lugan na ti pinuntirya da ket saan a direkta nga isuna.
