LAOAG CITY – Inlawlawag ni Mr. Paul Versoza iti Bureau of Immigration (BI) ditoy probinsya a basar iti rekord da ket tawen 2003 agingga iti 2016 pay laeng dagiti kaso ni Alexander Calapini-Solberg, agtawen ti 53 a natiliw iti Brgy. 48-A Cabunggaan ditoy ciudad ti Laoag City, ken maysa a notorious Norwegian pedophile a wanted idiay Oslo gapo iti panangmolestiya na kadagiti menor de edad.
Segun kenni Versoza, nakadanon ditoy Pilipinas ni Solberg idi 2016 ken nakaasawa ti Pilipino agingga a nagbalin a permanent resident, addan ti dua agingga iti tallo a tawenen ti napalabas.
Inbatad na sakbay nga immay ditoy Pilipinas, agsusukoten dagiti kaso na seknan iti sexual assault idiay Norway ngem intarayan na dagitoy ken napan iti nagduduma a nasyon agingga a nakadanon ditoy pagilyan.
Naamoan a sumagmamano kadagiti biktima ni Solberg ket mismo a kabagyan na.
Nupay kasta, kuna ni Versoza a ti Pilipinas ket signatory iti International Police Organization isut gapo na nga idi adda ti naitembre iti Interpol mainaig iti kaso ni Solberg ket otomatiko nga adda ti notice wenno alert kadakuada babaen iti diplomatic channel.
Kunana babaen iti Fugitive Search Unit ken dagiti miembro ti Intelligence Operative ti Camp Servillano idiay Tarlac ket adda ti back-up army operatives da iti panangtiliw da kenni Solberg.
Dinakamat na nga adda met ti panagresister ni Solberg ken saan met nga armado ngem ti asawa na ti dimmarop kadagiti agent a nakaiggem ti paltog.
Iti laksid daytoy, kunana nga awan met ti madi a napasamak iti asawa ni Solberg.
Mainaig iti daytoy, inbatad na a ni Solberg ket maipan iti Main Office ti BI, ken dumalan iti RT-PCR ken agtalinaed iti Jail Ward Facility da idiay BI-Bicutan bayat a maiprosproseso ti pannakdeportar na gapo iti multiple criminal warrant of arrests on sexual assault in minors.
Inpalgak met ni Versoza a saanen a naikoordenar kadagiti otoridad ditoy ciudad ti Laoag ti operasyon da gapo ta ammo dan a mismo ti ayan ti suspek ken saan met nga “armed and dangerous” ni Solberg basar iti notice a naited kadakuada.
Nupay kasta, kunana a no dadduma ket makikoordenar daytoy iti otoridad nangruna no saan a detalyado ti lokasyon ti suspek.
Kabayatanna, inlawlawag ni Versoza nga ita laeng a matiliw ni Soberg gapo ta nasken met nga ada ti masurot a proseso a rumbeng a masurot manipud iti naggapoan na a pagilyan no sadinno ket adda ti evaluation ken verification a maiyuswat.
Nagballaag met ni Versoza kadagiti ganganaet a masapol a suruten dagiti paglintegan dtoy Pilipinas tapno awan ti agbalin a problema iti panagtalinaed da ditoy pagilyan.
