LAOAG CITY – Nagballaag ti Bureau of Immigration (BI) kalpasan ti agtultuloy a panagngato ti bilang dagiti Pilipino nga illegal a rumrumuar ti pagilian tapno mapan agtrabaho iti nagduduma a paset ti Asya.
Binallaagan ni Bureau of Immigration (BI) Commissioner Joel Anthony Viado dagiti agkalikagom a mapan agtrabaho iti sabali a pagilian mainaig iti panagado dagiti illegal a maididiaya a trabaho iti nagduduma a pagilian iti Asya, idinto nga umad-ado met dagiti manangallilaw a recruiter a mangbikbiktima kadagiti Pilipino nga agkalikagom nga agtrabaho iti abroad.
Iti innem a repatriates, dua ti lalaki nga agtawen ti 29 ken 27, ken uppat ti babbai nga agtawen ti 21, 26, ken 29 ket simmangpet idi Miyerkules ti bigat manipod Phnom Penh, Cambodia.
Basar iti Bureau of Immigration, maysa kadagiti innem ti nagna iti illegal a ruta wenno “backdoor” iti Palawan, idinto a lima ti pimmanaw iti pagilian kas Turista manipod Maynila.
Inbatad ti maysa kadagiti biktima, ti kangrunaan a target ti operasyon da ket dagiti tattao nga agtrabtrabaho iti balay idiay Estados Unidos.
Inbutaktak ti Bureau of Immigration a kaadoan kadagiti biktima ket naallilaw tip eke a job advertisements ken naallukoy ti nangatngato a sweldo isut gapuna a nakipaset da kadagiti scam hub.
Innayon ni Viado nga ipakpakita ti kaso ti baro a taktika dagiti trafficking syndicate, nga us-usaren ti Cambodia kas source, transit, ken destination country para iti human trafficking.
