LAOAG CITY – Karebbengan ti publiko a maammoan ti napapateg nga impormasion mainaig iti tignay ken dagiti biahe ni Vice President Sara Duterte nangruna no adda ti epekto daytoy iti serbisio publiko.
Daytoy ket pammalagip ni Palace Press Officer Claire Castro kalpasan a kwinestionaran ti panagkiddaw ni Duterte ti confidentiality mainaig iti nagwaras a travel clearance daytoy para iti plano a pagbisitana iti lima a pagilian.
Inbatad ni Castro, gagangay laeng a masaludsod dagiti umili maipanggep iti daytoy kabayatan a sumangsango ti pagilian iti epekto ti tension iti Middle East ken kabayatan nga adda ti isyu a sangsangoen ti Bise Presidente mainaig iti maipagarup a ₱6.7 bilyon a kwestionable a transaksion.
Nupay kasta, inlawlawag ti Palasyo a saan a lappedan ti biahena gapu ta awan met ti hold departure order kontra kenkuana.
Kunana a ti saludsod ita ket no apay a kellaat a nagbaliw ti desision ti Bise Presidente ken no adda ti pakainaigan daytoy iti “₱6.7 billion question.”
