LAOAG CITY – Kinondenar ni United States President Joe Biden ti Russian missle strike a nakatayan ti di kumurang 38 nga indibidual kas maysa a palagip ti kinaranggas ti Russia bayat nga inkarina a papigsaenna ti air defences ti Kyiv.
Umabot ti 190 nga indibidual ti nasugatan iti Ukraine, pakairamanan ti dadduma a kadekkelan nga ospital para kadagiti ubbing .
Kinuna ti Russia a ti panagbettak ket gapuanan ti panagpaputok ti Ukrainian air defense missile, ngem kinuna ti United Nations a dakkel ti posibilidadna a ti Moscow ti adda ti likudan ti panagatake.
Segun ken ni US President Biden a maipakaammo ti kanayonan a panangparang-ay ti air defences ti Ukrain.
Mainaig iti daytoy, agtataripnong dagiti lider manipud kadagiti 32 NATO member states, pakairamanan dagiti kakadua a pagilian ken ti European Union para iti 75th anniversary of the bloc a manamnama a tumabuno ni Ukrain Presidente Volodymyr Zelensky.
