LAOAG CITY – Manamnama a lumawa ti agarup 200 nga acres wenno kaibatugan ti agarup 80 nga ektraya ti Big Island iti isla ti Hawaii.
Segun ken ni Bombo Interantional Correspondent Manny Pascua Bombo, daytoy ti pattapattaen dagiti siyentista ti US Geologycal Survey (USGS) kabayatan ti agtultuloy a panagsipsipot da ti aktibidad ti Kilauea volcano iti nasao nga isla.
Kuna na nga iti ti paset ti Leilani Estates ti apektado ti panaglawa ti nasao a lugar gapu iti agtultuloy a panagayos ti lava.
Maibasar iti panagadal dagiti eksperto, iti kada segundo ket agdagup ti 26 a ribo a gallons ti ipuswak ti saan pay a nagsardeng nga agalburoto a bulkan a kangrunaan a tuptuparen na ket ti baybay a paset ti Kapoho Area rason nga adda da pay dagiti lames iti naipaigid.
Kabayatan na, manipud iti 24 a bettak nga immun-unan a nagpuswak, maysa laeng ti nabati nga agpuspuswak iti kangato iti 130 ingganat 180 a kadapan.
