LAOAG CITY – Naglikudan ti Department of Agriculture a maysa a ‘political move’ ti inaramidda a programa ti gobierno a panaglako ti P29 iti kada kilo ti bagas, sumagmamano a lawas sakbay ti State of the Nation Address (SONA) ni Presidente Ferdinand Marcos Jr.
Segun ken ni Agriculture Assistant Secretary and Spokesman Arnel de Mesa, ti panaglako kadagiti nagduduma a klase ti bagas ket nabayagen a plano ti gobierno.
Kunana nga iti kinapudnona, sakbay pay ti pannakadutok ken ni Agriculture Secretary Francisco Tiu Laurel Jr. ket nabayagen a planplanoen ti gobierno kas sungbat metten iti immuna a pammilin ni Presidente Marcos nga ipababa ti presio ti bagas.
Inbatad ni de Mesa, dati metten a naduktalan dagiti paggapgapoan dagiti bagas wenno agsuplay ti nalaka a bagas a mailako kadagiti marigrigat a sektor.
Malaksid iti National Food Authority rice, kunana nga adda ti contract farming ti National Irrigation Administration a mabalin a makaipaay ti 121,000 a metriko tonelada ti bagas.
Immunan nga inrubuat iti nasao a programa kalpasan nga inaprobaran ti National Food Authority Council ti panagilako kadagiti daan nga stock ti bagas ti National Food Authority.
Gapu iti limitado a suplay, limitado met ti mabenepisiaran iti daytoy kas kadagiti senior, PWD, dagiti benepisiario ti Pantawid Pamilyang Pilipino Program, ken dagiti solo parents.
