LAOAG CITY – Saan pay laeng a mapalubusan a sumrek iti ili ti Vintar dagiti bikers nga aggapo kadagiti lugar ditoy probinsya a nakaro a naapektaran wenno nangato ti kaso na iti covid-19 virus.
Daytoy ket basar iti naipalaon iti inparuk-at nga executive order (EO) ni Mayor Larissa Foronda iti ili ti Vintar nga inaprubaran ni Governor Matthew Marcos-Manotoc.
Naamoan a dagiti lugar a maibilang a nakaro a naapektaran ti covid-19 ditoy probinsya ket dagiti addaan ti nasurok a 10 a kaso.
Naipalaon pay iti EO ni Mayor Foronda a dagiti mapalubusan a bikers a sumrek iti ili ti Vintar ket masapol a malimitaran agingga iti 10 laeng dagiti mabalin nga agkukuyug.
Malaksid iti daytoy, maipatungpal pay a curfew iti nasao nga ili no sadinno a mangrugi iti oras ti alas-onse iti rabii agingga iti alas-kwatro ti parbangong.
Uray ti panaglako ti arak ket adda ti malimitaran no sadinno a maipawil ti aglako mangrugi iti oras ti alas-onse ti rabii agingga iti alas-kwatro ti parbangon.
Gagem ti nasao nga addang ket tapno maliklikan ti pannakaiwaras ti makapatay a virus iti ili ti Vintar.
