LAOAG CITY – Maluksaw ti biktima iti pammagkong a ni Mr. Leomel Dorilag, residente iti Barangay 7 iti ili ti Sarrat gapu ta maipagarop a binaybay-an ti Philippine National Police ti kaso na.
Daytoy ket gapu ta saan a napilaan a dagus ti reklamo ti suspek a nangbagkong kenkuana agpapan ita.
Maipalagip a napasamak ti pannakabagkong ni Dorilag idi Disyembre 12, 2023.
Inpalgak ni Dorilag iti Bombo Radyo Laoag nga idi nagturong da iti Philippine National Police ken maipagarop nga inbatad da kenkuana a masapol nga ipadalan da paylaeng ti napasamak iti barangay.
Malaksid iti daytoy, inpetteng ni Dorilag a ti maysa pay a rason ti Philippine National Police no apay a saan a dagus a naipila ti kaso ket gapu ta maipagarop nga awan ti agtestigo iti baet nga inadmitir a mismon ti suspek ti inaramid na a krimen.
Innayon na nga iti laeng kallabes ket nagturong dagiti kameng ti pulisya iti balayda ken sinaludsud da no agpila ti reklamo wenno saan.
Kabayatanna, inlawlawag ni Police Capt. Almasan, ti chief of police iti ili ti Sarrat a saan da a naipila a dagus ti kaso kontra iti suspek gapu ta nakurang dagiti kasapulan da a dokumento kas iti medical certificate, nagbayadan ti biktima iti ospital ken dadduma pay.
Nupay kasta, inpasigurado ni Almasan nga ipila da ti kaso ti suspek intono Lunes ken maiparuk-at ti warrant of arrest para iti pannakatiliw ti suspek.
Nagkedked metten ni Almasan a nangsungbat kadagiti dadduma pay a saludsud ti news team ti Bombo Radyo Laoag mainaig kadagiti dadduma nga alegasyon ni Dorilag kontra iti Philippine National Police iti ili ti Sarrat.
