LAOAG CITY – Maluksaw ni Mr. Erwin Reginaldo a residente iti Brgy. 61 Cataban ditoy siudad ti Laoag ken biktima ti disgrasia idi Nobiembre 2, kalpasan a maipagarup a saan a tinnungpal ni Mr. Micheal “Macky” Batara a residente iti Brgy. Pila ditoy siudad iti kari na kenkuana a mangidiaya ti sueldo na sipud ta saan daytoy a makapagtrabaho.
Segun kenkuana, ti nagsasaritaan da a mangidiaya ni Batara iti panag-paagas ken sueldo kenkuana sipud ta saan daytoy a makapagtrabaho.
Innayonna, a nangipatulod isuna ti mensahe ken ni Batara ket rumrummuar nga awan ti napagsaritaan da iti nadakamat a banag.
Nupay kasta, naiget a naglikudan ni Batara daytoy a banag ket kinunana a nagsasarita da met dagitoy idi laeng kalman ti bigat maipanggep iti nasao nga isyu.
Kinunana nga ipaay na met dagiti kasapolan ni Reginaldo kas kadagiti panagbayad iti check-up, agas ken dadduma pay.
Patien ni Batara a saan met daytoy a nagkurang a mangipaay ti tulong kadagiti masapol ni Reginaldo para iti panagpaospital na.
Kabayatanna, kunana a dagiti laeng inkari na ken ni Reginaldo ket dagiti banag a kaya na laeng a maited kenkuana nangruna ta adda met ti bukod na a suportaran a pamilia.
