LAOAG CITY – Saan pay a nakariing sipud naitaray idi kalman iti Mariano Marcos Memorial Hospital and Medical Center ti ciudad ti Batac agpapan ita ti biktima ti self vehicular accident iti Bgy. Santiago iti ili ti Marcos.
Nabigbig daytoy a ni Nestor Dumlao y Casabay, agtawen ti 62, biyudo, aglaklako ti ikan residente iti Bgy. 23 iti ili ti San Nicolas.
Segun ken ni SPO1 Agosto Delacruz, investigator on case ti PNP-Marcos, iturturong ni Dumlao ni trisikel na a kurongkurong ket bayat nga agpalpalaod a direksiyon iti paset ti Bgy. Santiago ket bigla a naregreg ti “service drop” ti pagtaengan ni Sherwin Francisco a nakatamaan ti biktima.
Kuna na a maipagarup a naipulipol ti maysa kadagiti ligay ti trisikel ti naregreg a service droop a rason ti nagbalbaliktadan na.
Nagsagaba ti biktima ti naruay a sugat kadagiti nagduduma a paset ti bagi na nangnangruna iti ulo na.
Rumrumuar iti city scan ti biktima nga adda ti naglitem a paset ti utek na.
Maipalagip nga immuna a naitaray iti District Hospital ti biktima ngem gapu iti sitwasyon ket naiyakar iti MMMHMC iti ciudad ti Batac.
Kuna pay ni Delacruz a nairana iti pannakadisgrasya ni Dumlao iti panagkasangay na idi kalman.
