LAOAG CITY – Inbatad ni Police Lt. Berylle Dacudao, ti Deputy Chief of Police iti ili ti Pasuquin a pilaan da ti reklamo a panaglabsing ti Republic Act 10591 wenno Comprehensive Firearms and Ammunition Regulation Act ti biktima iti napasamak a disgrasya iti Barangay Estancia iti nasao nga ili.
Daytoy ket kalpasan a naalaan ti biktima ti maysa Colt Cal. 38 revolver nga addaan ti maysa a bala.
Ti biktima ket addaan ti umno a tawen, vegetable vendor, taga Pagudpud ngem agdama nga agnanaed iti ili ti Pasuquin.
Immuna iti daytoy, inpakaammo ni Dacudao a naitawag kadakuada nga adda ti kotse a nadisgrasya iti nadakamat a lugar isut gapuna a napanda nagresponde a dagus.
Segun ken ni Dacudao, nagbaliktad ti nasao a behikulo ken nagsagaba ti sugat ti driver isut gapuna a tinawagan da dagiti kameng ti Rural Health Unit tapno mataming daytoy.
Mainaig iti daytoy, inbatad ti biktima nga adda dagiti gamitna iti uneg ti lugan, ken iti panangkita dagiti otoridad ket ditoy a natnag ti paltog nga adda ti maysa a bala na, malaksid pay ti dua nga ektra a bala na.
Innayon ni Dacudao nga inadmitir ti biktima a bagina ti paltog ngem saan nga agsusurot ti sungbat na idi nasaludsud kenkuana no adda ti umiso a dokumento na, a mabalin a resulta ti pannakadisgrasya na.
Naamoan a naggapo ti biktima iti ili ti Pagudpud idi napasamak ti insidente.
Iti agdama, nagtalinaed ti biktima ti disgrasya iti Philippine National Police iti ili ti Pasuquin kabayatan a maisagsagana ti pannakaipila ti kaso kontra kenkuana gapu iti panagikot na ti paltog.
