LAOAG CITY – Inlawlawag ni Mr. Samuel Cimatu, residente iti Brgy. 51-A Nangalisan ditoy siudad ti Laoag ken biktima ti hit and run a nakana a sugat ti sinagaba ti asawa na ken ti anak na kalpasan ti desgrasya.
Napasamak ti pannakasapgud ti nagluganan na a motorsiklo kadua na ti asawa na ket ti anak da nga agtawen ti 12 iti Brgy. 16 San Marcos iti ili ti San Nicolas.
Nasapgud da babaen ti maysa nga Hyundai Starex van a puraw idi kalman ti malem.
Kuna ni Cimatu a nagsagaba ti anak ken ti asawa na ti sugat iti bagi da ken nadait ti sugat iti ulo ti asawa na.
Inlawlawag na nga agturong da iti siudad ti Batac tapno makiminatay ken adda da iti shoulder ti kalsada.
Simmaruno kadakuada ti van a napaspas ket kelaat a nasapgud da.
Inbatad ni Cimatu a posible nga adda ti gasgas iti passenger side ti van gapu ti pannakasapgud ti manibela ti motorsiklo da.
Panawagan na iti Starex van a nangsapgud kadakuada nga agpakita ken sungbatan da ti napasamak.
