LAOAG CITY – Natiliw ti maysa a lalaki a biktima ti pammagkong gapo iti panagpaputok na ti paltog idiay Barangay 2, San Roque iti ili ti Paoay.
Nabigbig daytoy a ni Charles Buduan y Ancheta, agtawen ti 36, naasawaan ken residente iti nasao a barangay.
immuna iti daytoy, bayat ti panaginom ni Charles ken dagiti kakadwa na ket simmangpet ti kabsat na a ni Jasper Buduan y Ancheta, agtawen ti 38, naasawaan ken ti asawa na tapno agkolekar ti kwarta iti paggasolinaan.
Nupay kasta, ditoy a timpuar ti riri dagiti agkabsat a nangitunda ti panangbagkong ni Jasper ken ni Charles usar ti kutsilyo a nakasugatan ti akinkannawan nga abaga na.
Gapo iti daytoy, napan nangala ni Charles ti paltog a 12 gauge shot gun ken nagpaputok iti pangato a direksyon.
Naamoan a sumango iti kaso nga alarm and scandal ni Charles ken no mapaneknekan a saan na a kukua ti paltog ket makaswan pay ti illegal possesion of firearm.
Rumrumwar a kukua ti ama dagiti dua ti paltog ngem nagkedked daytoy a mangipaay ti naan-anay a palawag ngem inbaga na laeng nga adda ti lisensya ti nasao a paltog.
Kabayatanna, inbatad ti PNP-Paoay nga idadaulwan ni Police Captain Eddie Suyat a ti nagririyan da Charles ken Jasper ket gapo iti kuntador a mausar no mano a litro a gasolina ti nalako.
Segun kenni Suyat, idi nagriri dagiti dua ket nagawid ni Jasper ken nagsubli iti gasolinaan ken ditoy a binagkong na ti biktima.
Rumrumwar a matmaturog ti ama da rason a naala ni Charles ti paltog na.
Mainaig iti daytoy, inlawlawag ni Suyat a saan a nakaswan ni Jasper a suspek ti pammagkong gapo ta naurnos ti panagriri da kenni Charles.
Iti agdama ket nagtalinaed iti kustudiyar ti PNP-Paoay ni Charles.
