LAOAG CITY – Inlawlawag ni Police Major Joseph Calderon, ti chief of police ti PNP-Dingras a kasarita ti biktima ti pammaltog iti Sitio Abkir, Barangay Suyo iti nasao nga ili para iti iyuswat da a naun-uneg nga imbestigasyon.
Segun kenni Calderon, ummuna a nakasarita dan ti live in partner ti biktima ken adda ti nadakamat a pakaseknan iti negosyo.
Nupay kasta, saanen a nangipaay ti Calderon ti ad-ado pay a detalye no anya nga anggulo ti pangrugyan ti imbestigasyon da.
Kunana nga idi rabii ket saan da unay a nakasarita a nasayaat ti biktima gapo ta dimmalan iti operasyon ti ulo na nga isu ti natamaan.
Maipalagip a nasugatan ti ulo ni Mr. Arthur Fernando, agtawen ti 37, addaan ti live-in partner, mannalon ken residente iti nadakamat a barangay kalpasan ti pammaltog.
Iti inisyal nga impormasyon a nakalap ti news team ti Bombo Radyo Laoag, adda ti sumagmamano nga indibidual a napan nangbisita ken ni Fernando iti balay da kalpasan na ket napan da pinasyar dagiti mula na a kamatis.
Naamoan nga iti panagsubli da Fernando iti balay da ket nakisarita pay laeng kenkuana dagiti bisita na ngem kalpasan laeng ti sumagmamano a minutos ket napaltoganen daytoy a nakasugatan ti likud ti ulo ti biktima.
Naitaray a dagus ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem naiyakar iti Mariano Marcos Memorial Hospital and Medical Center (MMMH&MC) iti ciudad ti Batac.
Awan dagiti ebidensya a narekobre dagiti otoridad iti nakapasamakan ti pammaltog.
Ummuna metten nga inpakaammo iti Bombo Radyo Laoag ni Police Major Jephre Taccad, ti pannakangiwat ti llocos Norte Police Provincial Office (INPPO) nga addan ti person of interest ti PNP-Dingras iti pannakapaltog ni Fernando.
Kuna na a basar kenni Police Major Joseph Calderon, ti chief of police iti ili ti Dingras, possible nga agam-ammo met laeng ti biktima ken ti suspek.
Innayon na a ti nausar iti krimen ket maipagarop a Caliber 22 a paltog ngem nagasat ti biktima gapu ta saan a napurwan ken iti agdama ket addan iti natalged a kasasaad.
