LAOAG CITY – Kinumpirmaran ni Doctor Conie Pulido iti Provincial Health Office (PHO) nga umaboten iti 71 a tattao dagiti nagpositibo ti sakit a dengue idiay ili ti Dingras.
Malaksid iti ili a Dingras ket adda met ti nairekord a 35 a kaso iti ili a Solsona idinto a 10 iti ili a Badoc.
Mainaig ti daytoy, kuna ni Doctor Sheryl Racelis iti Mariano Marcos Memorial Hospital and Medical Center (MMMHMC) iti ciudad ti Batac, umad-ado dagiti agbalbalin a pasyente da a gapu ti sakit a dengue.
Iti agdama ket adda ti 30 a biktima ti dengue a nagtalinaed iti nasao nga ospital ken dagiti dadduma ket nagyan da payen iti hallway.
Segun kenkuana, adda dagiti wagas tapno maliklikan ti dengue kas iti search and destroy, protection measures, early consulation ken fogging.
Nupay kasta, kuna na a saanna nga irekomendar ti panagfogging iti amin a barangay gapu ta nawara laeng dagiti dadakkel a lamok ken possible nga umallatiw da iti kabangibang a barangay.
Gapu ti daytoy, inbalakad ni Racelis a ti kapintasan nga aramiden ket ti mangikat kadagiti kiti-kiti tapno matay dagiti lamok.
