LAOAG CITY – Umaboten iti 167 ti bilang dagiti naapektaran ti sakit a dengue ditoy ciudad iti Laoag sipud idi enero agpapan ita.
Basar iti datos iti City Health Office (CHO), kaadoan kadagiti biktima ket manipod iti Barangay Lagui-Sail nga addaan iti 32 a kaso idinto a 9 iti Barangay 29 ken iti Barangay Camanggaan-B ket innem.
Inpasingked iti gobierno ti ciudad ti Laoag ti pannakaisayangkat ti fumigation wenno fogging iti kangrunaan na dagiti barangay nga adda kaso na ti sakit a dengue.
Mainaig ti daytoy, naibalakad kadagiti residente a pagtalinaeden ti agdalos iti aglawlaw tapno awan ti pagumukan dagiti lamok a carrier ti sakit a dengue.
Kabayatanna, umabot iti 24 a kaso ti dengue ti nairekord iti Laoag City General Hospital (LCGH) ngem kaadoan kadagiti biktima ket aggapo iti sabali nga ili.
