LAOAG CITY – Inpakaammo ni Governor Matthew Marcos Manotoc a malimitaran ti bilang ti kapasidad kadagiti mass gatherings ditoy probinsya.
Segun kenkuana, agarup 15 laeng a katao dagiti mabalin nga agatendar iti indoor gatherings idinto a 40 a katao dagiti mabalin nga agatendar iti outdoor gatherings regardless iti kapasidad ti venue.
Daytoy ket tapno maliklikan ti panagdudupudop dagiti tattao iti maysa a lugar tapno maliklikan iti panagwaras ti virus.
Inlawlawagna a maipatungpal daytoy ditoy probinsya malaksid laeng ditoy ciudad ti Laoag gapu pay laeng ti maipatpatungpal a Modified Enhanced Community Quarantine.
Inbatadna a daytoy ket gapu ta saan laeng nga iti Laoag ti apektado ti COVID rason a napanunotanda a limitaran ti bilang dagti agat-atendar kadagiti amin nga events.
Kunana a nakitada a ti kangrunaan a pagwarwarasan ti virus ket kadagiti pagdudupudopan dagiti tattao kas kadagiti birthday parties ken dadduma pay nga agisaysayangkat ti aktibidad.
Namnamaen ti gobernador nga agtulnog dagiti kailian iti daytoy a pammilin tapno ti kasta alalisto a malapdan ti panagwaras ti COVID-19.
