LAOAG CITY – Inpakaammo ni Mr. Freddie Cabrida, maysa kadagiti agdaldalos kadagiti tanem iti kamposanto ditoy siudad ti Laoag a bimmassit dagiti agpadpadalos kadagiti tanem ti kamposanto ita a tawen no idasig kadagiti naglabas a tawen.
Segun kenkuana, agarup sangagasut pay laeng dagiti nagpadalos kadakuada iti baet a sumagmamano laengen nga aldaw ket madanonen ti fiesta ti minatay.
Inbatadna a patienna a ti mapaspasaran a bagyo ti maysa kadagiti kangrunaan a rason no apay a bimmassit ti agpadpadalos kadakuada.
Kunana a gapu pay iti saan a napintas a sasaaden ti panawen ket marigatanda a mangallukoy kadagiti tattao nga agpapinta kadagiti tanem dagiti ay-ayatenda iti biag a natayen.
Inlawlawagna nga idi pay laeng Oktubre 24 ket nangrugi daytoyen nga agawat kadagiti agkalikagum nga agpadalos ken agpapintas kadagiti tanem.
Innayonna a dumanon iti 500 a pisos ti bayad dagiti agpadalos kadakuada ngem depende ti kadakkel ti tanem nga ipadalos wenno ipapintada.
Kabayatanna, inpasigurado ni Barangay Kagawad Jaime Guzman, ti Brgy. 1 San Lorenzo ditoy siudad ti Laoag a nakasagana a tumulong dagiti opisial ti barangay pakairamanan dagiti barangay tanodda para iti Undas 2024.
