LAOAG CITY – Inbatad ti National Center for Mental Health (NCMH) a masapul nga agannad dagiti pagadalan ken pamilia kadagiti senyales ti pannakariribuk kalpasan dagiti naranggas nga insidente kadagiti pagadalan, bayat ti panangmonitorda iti ad-adu pay nga agtutubo a tumawag iti crisis hotline-da.
Segun ken ni National Center for Mental Health (NCMH) chief Dr. Noel Reyes nga immadu iti uppat a daras dagiti tawag iti 24-hour hotline ti sentro manipud idi Covid-19 pandemic.
Napaliiw ni Reyes a dagiti estudiante a makapadas wenno makasaksi iti kinaranggas ket mabalin a makarikna iti buteng wenno pannakariro, marigatanda a maturog wenno ag-concentrate, wenno agkedkedda nga agsubli iti pagadalan.
Kunana a dagitoy a panagbalbaliw ket mabalin nga agtultuloy wenno manglapped kadagiti inaldaw nga aktibidad ti ubing ket rumbeng a mangtignay iti panangtingiting.
Inawaganna dagiti school personnel a siguraduenda ti pisikal a kinatalged dagiti estudiante, asikasuenda dagiti kangrunaan a kasapulanda ken pagtitiponenda manen ida kadagiti nagannak wenno mapagtalkan a mangay-aywan.
Rumbeng nga umawat dagiti ubbing iti nalawag, pudno nga impormasion a maiyataday iti edadda maipapan iti napasamak ken no ania ti maar-aramid tapno agtalinaedda a natalged.
Karaman kadagiti pakdaar a pagilasinan a dinakamat ni Reyes ket ti nakaro a buteng a manglapped iti panageskuela ti estudiante, recurring memories wenno nightmares, changes in sleep wenno appetite, physical complaints, expressions of hopelessness wenno guilt, ken ebidensia ti self-harm.
