LAOAG CITY – Bimmaba ti bilang dagiti agtutubo a nasapa a nagsikog ditoy probinsia.
Segun ken ni Mrs. Janet London, mangidadaulo ti Gender and Development Office ti gobierno probinsial, daytoy ket maibasar iti rimmuar a datos iti maikatlo a kuarter.
Inbatadna a saan pay a pinal ti datos a naipaima kadakuada gapu ta adda pay dagiti lokal a gobierno a saan pay a nakaipasa.
Inlawlawagna a no maidasig iti napalabas a kuarter ket kagudua ti nagbabaanna.
Kunana nga iti 3rd Quarter ket saanda a nangisayangkat ti Symposium kadagiti pagadalan no di ket Parenting Talk.
Mainaig iti daytoy, malaksid kadagiti ubbing ket karaman pay dagiti nagannak a makipartisipar tapno maikkanda ti adal maipanggep iti teenage pregnancy.
Kabayatanna, mamati ni London nga epektibo daytoy a wagas tapno agtultuloyen a bumaba ti kaso ti teenage pregnancy ditoy probinsia.
