LAOAG CITY – Inpakaammo ni Bombo International News Correspondent Demetrio Rafanan iti Rome, Italy a nanayunan iti 190 ti bilang dagiti natay gapu ti coronavirus disease.
Daytoy ti gapuna nga umaboten ti 1,016 ti bilang dagiti pimmusay gapu ti COVID-19 iti nasao a pagilian,
Kuna na nga umabot metten ti 15,113 ti naapektaran ti COVID-19 ken 12,839 dagiti positibo manipud iti nasao a bilang.
Kinumpirmaran ni Rafanan a gapu ti kaadu ti kaso ti coronavirus, agpipila dagiti ambulansya a mangitaray kadagiti pasyente iti ospital.
Mainaig iti daytoy, inalay-ayan ni Rafanan ti panagdanag dagiti kadaraan a Pilipino a nagtalinaed a tallo dagiti Pilipino iti Italya a naapaketaran iti COVID-19.
Nagnegatibo met iti virus ti Pilipino nga agnanaed iti Modena, Italy.
Innayon ni Rafanan a binalakadan ti gobyerno ti Italya ti publiko a saanen a rumbeng nga agturong iti ospital dagiti residente ngem ketdi tumawag da kadagiti emergency hotlines.
