LAOAG CITY – Umaboten iti 47 a kaso dagiti biktima ti paputok iti intero a pagilian.
Basar iti datos nga inparuk-at ti Philippine National Police, 13 ti nairekord a biktima iti Central Visayas, 7 iti Soccsksargen, ken 6 iti Metro Manila manipod Disyembre 16 agingga ita nga aldaw Disyembre 26.
Kabayatanna, agpada a 5 a kaso ti nairekord iti Cagayan Valley ken Cordillera Region; 4 iti Ilocos Region; sagdudua iti Calabarzon ken Western Visayas; ken saggaysa met iti Central Luzon, Northern Mindanao, ken Negros.
Iti inyuswat nga operasyon kontra iti ilegal a paputok ti PNP, nakumpiskar da ti sumuruk-kumurang maysa a milyon a pisos ti nagduduma a klase ti paputok iti intero a pagilian, ken naarestar ti 23 a tattao gapu iti illegal a panaglaklako dagitoy.
Kabayatanna, nagpalagip manen ti PNP mainaig kadagiti maipawil a paputok, karaman ditoy ti watusi, pop-pop, pla-pla, piccolo, five star, ken dadduma pay.
