LAOAG CITY – Ngimmato ti bilang dagiti enrollees ti Buttong Integrated School ita a tawen no idasig kadagiti naglabas a tawen.
Segun ken ni Mr. Arnel Sabuco, School Principal IV ti Buttong Integrated School, manipud iti agarup 700 a bilang dagiti estudiante nga agen-enroll iti pagadalanda ket nagbalin daytoyen nga agarup 900 ita a tawen.
Inbatadna a mamati daytoy a ti maysa kadagiti kangrunaan a rason ti kellaat a panagadu dagiti estudiante ket gapu iti panaglukat ti dakkel a mall ditoy siudad ti Laoag a mabalin a dagiti sumagmamano nga empleado ditoy ket nag-transfer of residence.
Inlawlawagna a gapu iti panagadu ti bilang dagiti agad-adal ket temporario pay laeng nga inusarda ti conference hall, covered court ken dagiti saan a maus-usar a room kas klasrum dagiti estudiante.
Kunana nga adda ti agarup 30 agingga iti 45 ti bilang dagiti agad-adal iti kada klasrum.
Mainaig iti daytoy, inpakaammo ni Sabuco a manamnama ti pannakai-turn over kadakuada ti uppat a klasrum manipud iti maysa a foundation iti umuna a lawas ti Hulio.
Innayonna a ti nasao a pagadalan ket mangisursuro ti Kindergarten agingga iti Grade 10.
Kabayatanna, naammoan a saan met a narigatan dagiti estudiante ken nagannak iti panangbiruk ti nagan dagiti annakda gapu iti tulong ti pannakaestablisar ti Help Desk.
