LAOAG CITY – Dumanonen iti 60 ti naduktalan ti Armed Forces of the Philippines nga 60 a non-existent wenno dagiti “ghost” flood control projects.
Daytoy ket kas paset ti panangtulong ti armada iti Department of Public Works and Highways (DPWH) a kangrunaan a mangiwaywayat ti inspection ken verification kadagiti nasao a proyekto basar iti available public records.
Inbatad ni Armed Forces of the Philippines Chief of Staff Romeo Brawner Jr., naikkan dagitoy ti actual coordinates a nasken nga inpatakder dagiti flood control project ken dagitoy ti napan kinita dagiti suldado.
Kunana nga adda ti 60 ti nakita ti team dagiti suldado kas non-existent wenno awan ti naipasdek.
Naammoan a dagitoy ket addaan ti available public records kas ti pundo, nagan ti contractor ken ti pangalaan ti pundo.
Dumanonen iti walo a ribu a flood control project ti natingiting ti Armed Forces of the Philippines.
Mainaig iti daytoy, inpakaammo ni Gen. Brawner, posible a ngumato pay ti bilang dagitoy gapu ta agtultuloy latta ti panaglikos ken inspection kadagiti nagduduma a lokasion.
Iti pakabuklan, naikkan ti Armed Forces of the Philippines ti agingga iti 16 a ribu a proyekto tapno tingitingen dagitoy.
Inlawlawagna a ti papel ti Armed Forces of the Philippines ket limitado laeng iti panangduktal no adda ti naipasdek a proyekto iti maysa a lugar iti tulong ti naala a coordinates.
Inpetteng ni Gen. Brawner, awan ti technical expertise ti military units tapno arisiten ti construction quality wenno kitaen ti compliance dagitoy kadagiti nakaipalaon nga specifications.
Innayon pay ti heneral nga amin a report mainaig iti flood control project ket maipaima iti Department of Public Works and Highways no sadinno a nakadependen iti ahensia a mangipatulod kadagiti engineer daytoy tapno mangiwayat ti validation iti report.
