LAOAG CITY – Ngimatngato ti bilang dagiti agpospositibo iti dengue ditoy probinsiya.
Segun ken ni Dr. Rickson Balalio, mangidadaulo ti Provincial Health Office, ti datos dagiti nagpositibo iti dengue manipud idi Setiembre 29 agingga Oktubre 5 ket dumanon iti 534.
Inbatadna a daytoy ket adagup iti 7 a baro a kaso iti ili ti Bacarra, 3 iti ili ti San Nicolas, 2 ditoy siudad ti Laoag, 2 manipud iti ili ti Sarrat, Batac ken Currimao, ken 1 iti ili ti Pagudpud, Pasuquin, Vintar, Paoay, Pinili ken Banna.
Kinunana iti umuna a distrito ditoy probinsiya, ditoy siudad ti Laoag ti kaaduan ti nairekord a nagpositibo no sadinno umabot daytoy iti 76, sumaruno iti ili ti Pagudpud nga addaan iti 54 a kaso.
Mainaig iti daytoy, iti maikadua a distrito ket iti siudad ti Batac a nakairekord ti 108 a bilang ti kaso idinto a sumaruno iti ili ti Badoc nga addaan ti 31.
Innayonna nga iti intero a probinsiya sipud iti bulan ti Enero ita a tawen ket adda ti maysa a pimmusay manipod iti ili ti Dingras.
Kabayatanna, agtultuloy ti araramiden ti Provincial Health Office a ballaagan ti publiko maipanggep iti sakit a dengue ken kiniddaw ni Balalio a rumbeng nga agkaykaysa dagiti umili tapno malabanan ken agsardeng ti panagadu ti kaso iti dengue ditoy probinsia.
