LAOAG CITY – Naragsak nga inpakaammo ni Ms. Mary Joan Pasugui, Local Committee Against Trafficking – Violence Against Women and their Children ditoy siudad ti Laoag a bumabbaba ti bilang dagiti maab-abuso a babbai wenno ubbing nga agturturong iti opisinada.
Inbatadna a napintas daytoy a damag gapu ta makitana nga adda ti pakaipapanan dagiti isaysayangkatda a programa ken aktibidad para kadagitoy.
Inlawlawagna a babaen kadagiti symposium wenno lectures ket ad-adda a mapatibker dagitoy ken maipaayanda ti adal maipanggep kadagiti karbenganda.
Kunana a masapul a maipakaammo dagiti linteg a mabalin a makatulong kadakuada babaen iti panangsursurda kadagiti pagadalan ken barangay.
Innayonna a babaen kadagitoy a programa ken aktibidad ket maipaadal kadagiti agtutubo a mangilaban ti tunggal karbenganda.
