LAOAG CITY – Nailatang ti dakdakkel a pundo para iti scholarship program ti gobierno probinsial ita a tawen 2021.
Daytoy ti inpakaammo ni Sangguniang Panlalawigan Member Saul Lazo, chairman ti committee on education ti Sang. Panlalawigan.
Kuna na a karaman ditoy ti pannakaipatungpal ti Scholarship program para iti Doctor of Medicine.
Inlawlawag ni Lazo a naipaayan ti dakdakkel nga oportunidad dagiti agaplikar iti daytoy a programa dagiti mangal-ala iti kurso ti medisina kalpasan a nanayunan ti bilang dagiti maala nga iskolar.
Namunganay daytoy kalpasan a 100 a porsiento a nakapasa dagiti nakipaset iti Physician Licensure Examination wenno Physician Board Exam a nagadal iti Mariano Marcos State University.
Inbunannagna a manipud iti dati a dua nga iskolar iti kada year level ti maiyalokaran ti pundo ket napagbalin nga uppat dagiti maakumudar nga iskolar.
Mainaig iti daytoy, imbatadna a manipud iti dati a walo nga iskolar ti maala iti tinawen ket napagbalin a sangapulo ket innem iti kada tawen.
Pinasingkedanna nga iti masungad nga “academic year” ket mangrugin a maipatungpal ti nasao a programa.
Mangnamnama ni Lazo nga agtultuloy ti panagbalin a doctor dagiti agbalin nga iskolar ti probinsia tapno dagitoy ti tumulong a mangtagiben iti nasayaat a salun-at dagiti umili.
Innayonna a daytoy ti maysa kadagiti kangrunaan a rason a napanunutanda nga opisial ti probinsia a maipatungpal ti scholarship program para iti Doctor of Medicine gapu iti panagkurkurang dagiti doctor ditoy probinsia.
