LAOAG CITY – Umad-ado dagiti indibidual a manggungundaway ti civil service ken licensure examination assistance ditoy probinsia.
Ti nasao a programa ket mamindua a daras a maipatungpal iti kada tawen para kadagiti civil service examiners idinto a quarterly ti licensure examiners.
Segun kenni Mr. Randy Labasan, Administrative officer iti Ilocos Norte Youth Development Office, kalepleppas laeng ti pannakaibunong dagiti assistance kadagiti civil service examiners.
Inlawlawagna a dagitoy ket dagiti umuna a gundaway a padasenda ti ageksamen, kasta met kadagiti licensure examiners.
Kunana a malaksid iti tulong pinansyal ket maisuro pay kadagiti maseknan dagiti paset ti eksaminasyon a pagkapuyan da babaen ti instructor manipod kadagiti unibersidad.
Adda met ti maisayangkat a pre-evaluation tapnu makita nu ania dagiti banag a maikkan ti importansya ken adda pay ti post evaluation tapnu makita nu adda ti nagdur-asan ti pannakaisuro da.
Naamoan a dandani amin a manggungundaway iti nasao a programa ket makapaspasa kadagiti nadakamat nga eksaminasyon.
