LAOAG CITY – Inpanakkel ti Department of Social Welfare and Development (DSWD) ti nangato a bilang dagiti marigrigat a senior a nairanud iti nangatngato a social pension ita a 2024.
Iti umuna nga innem a bolan ita a 2024, umaboten iti 3.7 milyon a marigrigat a nataengan ti nairanud iti nasao a programa ken naipaayan dagitoy ti pensyon nga adda ti pakabuklan na a P21.8 billion.
Ti dakkel a pondo ket gapu iti nangato a pensyon dagitoy isut gapuna a nadoble ita a tawen.
Maipalagip a ti dati a binolan a pensyon dagiti senior citizens ket P500 ngem napagbalin a P1,000 a maaw-awat dagiti maseknan kas social benefits iti babaen ti Department of Social Welfare and Development.
Naamoan a dagiti benepisyaryo iti nasao a programa ket dagiti adda ti sakitna, awan ti permanente a pamastrekan na, awan ti regular a maaw-awat na a suporta manipod kadagiti kabagyan ken awan ti sabali a maaw-awat na a pensyon.
