LAOAG CITY – Kinumpirmaran ni Police Major Joseph Baltazar, hepe ti PNP San Nicolas nga adda dagiti sumagmamano a requirement ti Bureau of Jail Management and Penology ken ti Ilocos Norte Provincial Jail kas iti panagswab test.
Kuna na nga iyuray da ti commitment order manipud iti korte ken iti pannakaipadalan iti swab test dagiti suspek sakbay a maipisok da kadagiti nasao a pasilidad.
Segun kenni Baltazar, nasken a masurot a naimbag dagiti requirements tapno maiyakar dagiti maseknan kadagiti pasilidad.
Umaboten iti siyam dagiti suspek a nagtalinaed iti kustudyar ti PNP San Nicolas.
Saan a maliklikan ti saan a pannakasurot ti social distancing iti uneg ti karsel ngem naiget ti pannakasurot dagiti dadduma nga health protocols.
Inbatad ni Baltazar nga adda ti ipaay da a face mask nga usaren dagiti balud ken adda ti pagbunguan iti ima nga inyestablisar da.
