LAOAG CITY – Dumanon iti sumurok 2,700 dagiti nakapagparehistro para iti Barangay and Sangguniang Kabataan Elections ditoy siudad ti Laoag.
Segun ken ni Ms. Crisanta Alejandro, Election Assistant II ti Commission on Elections ditoy siudad, ti kangrunaan a nakapagparehistro ket dagiti agtawen ti 14 agingga iti 18 wenno dagiti newly registered voters.
Inbatadna nga iti 10 nga aldaw a panangisayangkatda ti voters registartion ket arig blockbuster ti kaadu dagiti napan nanggundaway.
Kunana a dakkel a nakatulong ti panangiwayatda ti voters registration iti dakkel a mall ditoy siudad ti Laoag gapu ta naobserbaranda a naruay ti nagturong iti lugar gapu iti nalawa nga espasiona ken saan a nabara.
Innayonna a naakamodarda a nasayaat dagiti nagpakorehir ti nagan ngem gapu iti kinaadu dagitoy idi kalman ket naiyalud-od pay ti oras tapno laeng malpasda amin a maiparehistro dagitoy.
